مكتب صحي لندن هالوووو !. بـ قلم محمد الشمري

من جديد ويارب تكون هالسفره سفرت خير أربك كملت علاجك ؟.. ثم أضاف الرجل بالأصالة عن نفسي ونيابتا عن رواد الديوانية اقول والله كلنا شوق لك ولسوالفك وهدياك وقبلهم نبيك تشد حيلك لأننا نبِّي جديدك المتميّز .

الشايب : الله يحييكم ويخليكم لعينن ترجيكم والله لا يحرمنا من تواصلكم العذب .. وش هالحركات والسلامات يا جماعة هذا شي تدمع له العين .. والله نسيتونى هم وغم هالسفره التعيسة الله لا يذكرها بخير .
الخبير : خير ياحج جرا ايـــه فضفض يا ضنايا قول كل اللي بنفسك مش هنقاطعك الا بالخير .
الشايب : والله يا جماعة الخير المكاتب الصحية اللي بلندن بهدلتنا اول ماهو المكتب الصحي لوزارة الصحة اللي عاملنا معاملة خدم مو مواطنين .. اول مراجعة حسّيت أني داخل معتقل ماهو مكتب صحي !.
الشاب : ياحجي لاتهول الأمور مو للدرجه هذي الظاهر خانك التعبير ؟.
الشايب : لا والله انا صاج والله يخليكم بلا مقاطعة عشان أوصل فكرتي ومشكلتي ومشكلة جميع المرضي .. اول شي اخذوا جوازاتنا وعطونا عنها صورة يعني اللي نسويه بخدمنا الجدد طلعوه علينا .. وهذا وش يسمونه يامتعلمين يابتوع المدارس ؟.. وثاني شي المعاملة سيئة للغاية بالمكتب من نظام ودخول على الدكاتره السبعه بمكاتبهم اللي حاشرينهم بغرفة اربعه باربعة والله يكفيك شر نفسيات بعضهم .. هذا غير غلاسة وطناش موظفين الاستقبال السودانيين واستثني منهم علاء .. وطول ما انت بلندن ماغير رايح راد للمكتب تجيب (غرنتي ) للمستشفيات بكل شي !.. وربعنا من كثر روحاتهم جنهم بجادة نمل يتتالون .. وما عند أهل المكتب غير كلمة وحده نخاطب الكويت كل ما حولك دكتور لدكتور ثاني وهذا انت شغال واسطات على كل شي يبيه اي دكتور خطك مايسكر مع الواسطه بالكويت .. ايييه قبل ما انسي المكتب الصحي للأسف مايزودك باي معلومات في حالة وصولك للعلاج لأي طاري يعني دبر نفسك بنفسك ان طحت مريض ماتدري وين تروح ؟.. وكل هذا رزق لدكاترة الصيدليات الخاصة بالعربي المكتب الصحي وجوده مثل عدمه لا رئيس يتابع ولا نائبه ماغير جالسين بمكتب واحد جنهم يراقبون بعض .. وأن بغيت تدخل عليهم سجل اسمك وانطر دورك وان دخلت مامن سنع ماعندهم تفريج كربة أبد ماغير نخاطب الكويت وهذي التعليمات ومانقدر نتجاوزها بس شاطرين يستقبلون كمبارس الممثلين بالضحك والترحاب والله اعلم وشراح يسون لهم ان خذوا ادوار سنيده ؟ .. وكل هذا بسب عدم الرقابة من وزارة الصحة اللي معطيتهم الخيط والمخيط وهم للأسف متكاسلين لا ابعد الحدود بس شاطرين باستقبال اكياس الهدايا ! .. وكل هذا كوم واللي جاى كوم اول مراجعة لي عند الدكتور اللي انا جايه مارضي يستقبلني !.. اول ماقراء اسمي طار فيني وفرح وعطاني فواتير عملية كنت مسويها قبل سنه ونص ما اندفعت وقال خبيبي ادفعتوا فيلوسو يدخل قلت للمترجم قله انا هالحين جاى على وزارة الصحة وفلوسكم على العسكري قال الدكتور خبيب قلبي يدفع يدخل .. ما طولها عليكم أخذت فواتيره وطرت للعسكري وقالوا كلها أسبوعين وندفع له وانا ماغير رايح راد بينهم ثلاث مواعيد طنشني فيهم الدكتور أكلم المكتب الصحي ويردون على وشنسوى فيه ما دخلني الا يوم كلموه المكتب العسكري .. والله ياجماعة الخير ماهي بعيده بكره صور مرضي الكويت معلقه على طوف المستشفيات تحت عبارة (ونتدد) مالت مجرمين افلام الكاوبوي وكله من مكاتب ماتخاف الله .. والله يا اخوان الوضع يفشل بهالمكاتب الصحية وكسبت الكويت من وراهم السمعة الشينة وللاسف كل المستشفيات تشتكي من تاخر فلوسهم .. ما اقول غير حسبي الله ونعم الوكيل بأهل المكاتب الصحية المتواجدة بلندن وخصوصا المكتب الصحي الخاص بوزارة الصحة لأنهم ناس مقصرين بشغلهم في ظل سياسة الطناش اللي متبعتها وزارة الصحه .. وللاسف هالمكتب تتعامل معهم بطيب وادب ياكلونك وياكلون حقك من هالشق لهالشق واللي يداحرهم ويناجرهم بصوت عالي هو اللي يأخذ حقه واكثر .. السوالف كثيرة ياجماعة الخير بعضها ما ينقال حرصا على الذوق العام للقراء الأعزاء هذا غير إحساسي أني طولت لأَنِّي عارف ان مافيه احد من المسئولين راح يقراء وبالأخير ما اقول غير حسبي الله ونعم الوكيل فيهم .

المتمولس : ليش الشوكولاتة والورد يستخدمونها ك وسيلة اعتذار .. الجريش وش فيه ؟!.. وفي هذه الأثناء رفع على مسامعنا الشيخ زغلول اذان الظهر .

محمد خلف الشمري