الحكومة ماهي مشتهية حل مشكلة الرياضة !. هذا مايراه محمد الشمري

الحكومة قرارات حازمة ملزمة للكل .. بعيدا عن المحاباة لطرف على حساب طرف هذا ولدنا ومنا وفينا وهذاك ولدنا بعد وهم منا وفينا .. يا حكومة ان كنتوا تبون رياضة صح طبقوا القوانين المحلية كلها غصب عن الكل واللي ماهو عاجبه الف طريقة وطريقة عندكم تتعاملون معاه .. هذا اذا عندكم نية إصلاح للرياضة وانا اعتقد ان ماعندكم نية للإصلاح ..

وأول طرق الإصلاح تطبيق الانتخابات بصوت واحد واللي ماهو عاجبه أوقف الدعم عنه دامها خاربة خاربة وابصملكم بالعشرة كلها كم شهر وهي تطخ وتمشي على عجين الحكومة وماتلخبطوش .. واتركوا عنكم وفود شعبية ودخل محدود لانها ضحك على الذقون وماغير تطويل للسالفة مو اكثر .. واكبر دليل هو عندما طالبوا بعض الاتحادات التصويت معهم لرفع الإيقاف جتهم الإجابة أقنعوا ممثلينكم اولا (واعيباه) ..

والله هالناس تفهم وجابت لكم الزبدة أصلحوا حالكم واحنا معاكم واتركوا عنكم الهذره اللي مالها داعي ووفود رايحه وجايه على حساب الدولة .. خلاص يا جماعة الخير الكرة صارت بملعب الحكومة وهي اللي راح تحل مشكلة الرياضة بتطبيقها القانون على الكبير قبل الصغير وغير هذا مضيعة للوقت واتركوا اللي يقول اجيال راح تضيع هي وينها هالاجيال اللي حنا متوسمين فيها خير ؟..

للأسف فرقنا متعودة ديما على الهزايم وبركة اللي جت على جذي .. ولعلها خيره عشان نصلح حالنا بهالتوقف واتمني من الله إصدار قرار حكومي بإبعاد كل من له صله بالرياضة بكل الأندية والاتحادات خلال أزمتنا اللي لها عشر سنين وسلامتكم .

محمد خلف الشمري